Туркиянинг Истанбул шаҳрида бўлиб ўтаётган Бутунжаҳон шаҳмат олимпиадасида 10-тур ўйинлари якунлади.

Ўзбекистон эркаклар терма жамоаси кеча кучли рақиблардан бири - Болгарияга қарши дона суришди ва ишончли ғалабага эришишди. Айниқса, Рустам Қосимжонов дунёнинг энг кучли шахматчиларидан бири - Веселин Топаловни тор-мор келтиргани бошқа спортчиларимизнинг ҳам руҳини кўтариб юборди.

Қора доналарда ўйнаган Жўрабек Ҳамроқулов ҳам рақиби устидан ғалаба қозонди. Ўйинда болгариялик шахматчи сифат устунлигига эга бўлишига қарамай, ҳамюртимиз пиёдани фарзинга олиб чиқа олди ва шундан сўнг рақиб таслим бўлди. Андрей Квон ва Марат Жумаев эса ўз партияларин дуранг билан якунлашди. Якуний ҳисоб - 3-1.

Ўзбекистон - Болгария - 3-1
Рустам Қосимжонов - Веселин Топалов - 1-0
Марат Жумаев - Иван Чепаринов - 0,5-0,5
Андрей Квон - Александр Делчев - 0,5-0,5
Жўрабек Ҳамроқулов - Момчил Николов - 1-0.

Ўзбекистон эркаклар терма жамоаси ушбу ғалабадан кейин очколари сонини 14тага еткди ва 10-поғонага кўтарилиб олди. Мусобақа жадвалини эса Хитой, Арманистон ва Россия терма жамоалари бошқаришмоқда.

Эртага эса сўнгги тур ўйинлари ўтказилади. 11-турда қизлар терма жамоамиз Вьетнам билан баҳс олиб боришади. Вьетнам ҳозирча 14 очко билан 15-ўринни эгаллаб турибди. Улар мусобақада 27-тартибли жамоа сифатида қайд этилишган.