"Кристал Пэлас" ҳужумчиси Уилфрид Заха фаолиятини Англия Премьер-лигасининг кучлироқ клубда давом эттириши мумкин. 2023 йилнинг ёзида Заханинг Лондон клуби билан шартномаси тугайди ва у эркин агент мақомини олади.
TalkSport хабарига кўра, 30 ёшли Заха муддати тугайдиган шартномасини узайтирмоқчи эмас ва эркин агент мақомидан келиб чиқиб, у бир вақтнинг ўзида бир нечта Премьер-лига клубларидан таклиф олиши мумкин. "Арсенал" бош мураббийи Микель Артета футболчининг иқтидорини бир неча бор қайд этган ва унинг трансферини талаб қилиши мумкин. "Челси" ҳам ивуарлик билан боғлиқ вазиятни кузатиб бормоқда.
Заханинг фаолиятини Англиядан ташқарида давом эттириш варианти ҳам истисно этилмаган. Олдинроқ вингерга "Барселона" ва "Ан-Наср" клублари қизиқиш билдираётгани ҳақида хабар берилганди.
Заха жорий мавсумда Премьер-лигада 20 та ўйинда майдонга тушиб, 6 та гол урди ва 2 та голли узатмани амалга оширди.