"Kristal Pelas" hujumchisi Uilfrid Zaxa faoliyatini Angliya Premyer-ligasining kuchliroq klubda davom ettirishi mumkin. 2023 yilning yozida Zaxaning London klubi bilan shartnomasi tugaydi va u erkin agent maqomini oladi.

TalkSport xabariga ko‘ra, 30 yoshli Zaxa muddati tugaydigan shartnomasini uzaytirmoqchi emas va erkin agent maqomidan kelib chiqib, u bir vaqtning o‘zida bir nechta Premyer-liga klublaridan taklif olishi mumkin. "Arsenal" bosh murabbiyi Mikel Arteta futbolchining iqtidorini bir necha bor qayd etgan va uning transferini talab qilishi mumkin. "Chelsi" ham ivuarlik bilan bog‘liq vaziyatni kuzatib bormoqda.

Zaxaning faoliyatini Angliyadan tashqarida davom ettirish varianti ham istisno etilmagan. Oldinroq vingerga "Barselona" va "An-Nasr" klublari qiziqish bildirayotgani haqida xabar berilgandi.

Zaxa joriy mavsumda Premyer-ligada 20 ta o‘yinda maydonga tushib, 6 ta gol urdi va 2 ta golli uzatmani amalga oshirdi.