Италиянинг Турин шаҳрида маҳаллий “Ювентус” ҳамда Германиянинг “Фрайбург” клублари ўртасидаги Европа лигаси 1/8 финалининг илк учрашуви якунига етди. Ўйинда мезбонлар 1:0 ҳисобида ғалаба қозонишди. Ягона гол аргентиналик “Ювентус” ҳужумчиси Анхель Ди Мария ҳисобига ёзилди.
Учрашувнинг биринчи бўлимида ўйинда ҳисоб очилмади, аммо иккинчи бўлимнинг 53-дақиқасида Ди Мария жарима майдончасидан йўллаган зарбаси голга айланди ва бу “зебралар”га ғалаба келтирди.
Европа лигасининг 1/8 финалидан ўрин олган “Ювентус” ва “Фрайбург” ўртасидаги жавоб учрашуви 16 март куни Германияда бўлиб ўтади.
