Жорий мавсумда Қозоғистон чемпионатида иштирок этаётган Тошкентнинг «Ҳумо» хоккей плей-офф босқичининг ярим финалидан ўрин олган дастлабки ўйинни ўтказди.

Хоккейчиларимизга Қозоғистоннинг «Бейбарис» клубига рақиблик қилди. Биринчи бўлим ўрталарида қозоғистонликлар ҳисобни очишга муваффақ бўлган бўлса, тайм тугашига 3 дақиқа қолганида Кириллов мувозанатни тиклади.

Иккинчи бўлимда «Бейбарис» яна олдинга ўтиб олди — 1:2. "Ҳумо" эса ҳисобни тенглаштиришга анча қийланди. Жамоамиз бу ишни ўйин тугашига атиги 2 сония (!) қолганида уддалашди. Яна ўша Кириллов томонидан йўлланган кучли бўлмаган зарба натижасида шайба хоккейчилар орасида ўтиб кетиб, дарвозага тўрига бориб тушди.

Аммо ғалаба барибир «Бейбарис»га насиб этди. Овер-таймнинг 10-дақиқаси якунланаётган паллада Денис Михнин гол муаллифига айланди.

Шу тариқа, "Ҳумо" - «Бейбарис» тўқнашувида қозоғистонликлар олдинга ўтиб олишди. Жамоалар ўртасидаги иккинчи баҳс бугун "Ҳумо" аренада бўлиб ўтади. Ўйин Тошкент вақти билан 17:00да старт олади.

Рақиб майдонидаги кейинги 2та баҳс 16 ва 17 март кунларига белгиланган. Ярим финал баҳслари жамоалардан бири 4 та ғалабани қўлга киритгунга қадар давом этади.

Хоккей. Қозоғистон чемпионати. Ярим финал, 1-ўйин

"ҲУМО" "БЕЙБАРИС" - 2:3 ОТ (1:1, 0:1, 1:0, 0:1)

0:1 - 09:53 - Иванов (Бурделёв, Холоденин)
1:1 - 17:19 - Кириллов (Рехтин)
1:2 - 33:06 - Воробьев (Михайлов, Ершов)
2:2 - 59:58 - Кириллов
2:3 - 69:54 - Михнин (Кутугин, Маркелов)