Суперлига 2-туридан ўрин олган “Насаф” – “Турон” (2:1) учрашувидан сўнг мезбонлар бош мураббийи Рўзиқул Бердиев ўз фикрларини билдириб ўтди.

“Қаршига келган жамоалар кўпроқ ҳимояланиб, вақтни чўзиш орқали темпни туширишга ҳаракат қилмоқда. Иккинчи бўлимда иштиёқни оширдик ва шунинг эвазига ғалабани қўлга киритдик. Ҳар доим шундай ўйнашга ҳаракат қиляпмиз, лекин рақибларнинг темпни туширишга бўлган уринишлари сабаб бизга қийин бўлмоқда.

Сидиқов катта ҳажмдаги ишни бажармоқда. Беллашув сўнггида узун паслар билан ўйнадик ва шу сабаб уни захирага олдим. Абдураҳимов жароҳатидан тўлиқ тикланмагани сабаб қайдномадан ўрин олмади. Етакчи футболчиларнинг кетганлиги барибир ўз сўзини айтмоқда. Қолаверса, Станоевич ва Лиманинг йўқлиги ҳам стандарт вазиятларда жуда сезиляпти. Баҳром ва Круз тез орада сафга қайтади. Марконинг қайтишини эса яна 1-2 ой кутамиз.

Муҳаммаджон Раҳимов Тожикистон чемпионатидан келиб қўшилди. Албатта, бунда лиганинг савиясида катта фарқ бор. Унга озгина вақт керак бўлади”, – деди Бердиев.