Superliga 2-turidan o‘rin olgan “Nasaf” – “Turon” (2:1) uchrashuvidan so‘ng mezbonlar bosh murabbiyi Ro‘ziqul Berdiyev o‘z fikrlarini bildirib o‘tdi.
“Qarshiga kelgan jamoalar ko‘proq himoyalanib, vaqtni cho‘zish orqali tempni tushirishga harakat qilmoqda. Ikkinchi bo‘limda ishtiyoqni oshirdik va shuning evaziga g‘alabani qo‘lga kiritdik. Har doim shunday o‘ynashga harakat qilyapmiz, lekin raqiblarning tempni tushirishga bo‘lgan urinishlari sabab bizga qiyin bo‘lmoqda.
Sidiqov katta hajmdagi ishni bajarmoqda. Bellashuv so‘nggida uzun paslar bilan o‘ynadik va shu sabab uni zaxiraga oldim. Abdurahimov jarohatidan to‘liq tiklanmagani sabab qaydnomadan o‘rin olmadi. Yetakchi futbolchilarning ketganligi baribir o‘z so‘zini aytmoqda. Qolaversa, Stanoyevich va Limaning yo‘qligi ham standart vaziyatlarda juda sezilyapti. Bahrom va Kruz tez orada safga qaytadi. Markoning qaytishini esa yana 1-2 oy kutamiz.
Muhammadjon Rahimov Tojikiston chempionatidan kelib qo‘shildi. Albatta, bunda liganing saviyasida katta farq bor. Unga ozgina vaqt kerak bo‘ladi”, – dedi Berdiyev.
