Мадриднинг "Реал" клуби президенти Флорентино Перес ва бош мураббий Жозе Моуриньолар жамоа ҳужумчиси Криштиану Роналду билан шу ҳафтада учрашишлари кутилмоқда. Бу ҳақда АS нашри хабар тарқатди.
Манбанинг хабар беришича, ушбу учрашув чоршанба куни бўлиб ўтиши эҳтимоли юқори. Томонлар музокара ўтказиб, бу муаммонинг ечимини топишга уриниб кўрадилар.
Португалиялик футболчи ўзи билан янги шартнома борасида музокара бошланмаганидан норози бўлмоқда. Футболчи билан мавжуд бўлган амалдаги шартнома муддати 2015 йилда якунига етади. Клубнинг бошқа футболчилари Ди Мария, Арбелоа, Альбиол ва Игуаинлар янги шартнома тузиб бўлишган ва бу ҳолат Роналдунинг хафа бўлишига сабаб бўлган.
Бундан ташқари, Криштиану Роналду УЕФА талқини бўйича Европанинг энг яхши футболчиси бўлишда клуб унга маълумот тарқатиш борасида етарлича ёрдам бермади дею ҳисобламоқда.













