“Манчестер Юнайтед” ярим ҳимоячиси Факундо Пельистри Европа лигаси 1/8 финали жавоб учрашувида “Бетис” устидан қозонилган ғалаба (1:0) ҳақида фикр билдирди. Англия жамоаси якунда чорак финалга йўл олди.

“Ажойиб тажриба. “Манчестер Юнайтед” сафида асосий таркибда дастлабки ўйинни ўтказдим ва бундан фахрланишим мумкин. Биз бу ерга ғалаба қозониш учун келганмиз ва бахтимизга, ғалаба қозонишга муваффақ бўлдик. Улар ҳисобда ортда қолаётгани учун бизга босим қилишга ҳаракат қилишларини билардик. Биз юқори прессинг ва ўз ўйинимизни кўрсатишга ҳаракат қилдик. Бир нечта диққатга сазовор вазиятлар яратилди. Биз иккинчи бўлимда улар катта кучлар билан олдинга боришларини тушундик ва шу сабаб уларни қарши ҳужумда ушлашга ҳаракат қилдик", - дея Пельистри сўзларини келтиради УЕФА матбуот хизмати.

17 март куни Ньон шаҳрида Европа лигасининг 1/4, 1/2 ва финалига қуръа ташлаш маросими бўлиб ўтади.