Келаси йилги мавсумда Ўзбекистон учун Чемпионлар лигасида нечта ўрин берилиши ОФК тафтиш комиссияси текширув натижаларига боғлиқ. Бу нафақат ўзимизга, балки бошқа давлатларнинг текширувдан қай даражада ўтишига ҳам бевосита боғлиқ. Аввал хабар бериб ўтганимиздек, бу йўлда бизнинг асосий рақобатчимиз Эрон бўлади.

Шу йилнинг 4-9 сентябрь кунлари ОФК тафтиш комиссияси Эрон футболини текширувдан ўтказди. Комиссия аъзолари Эрон чемпионатининг 6та клубини тафтиш қилишди (қолган клублар ўтган йили текширувдан яхши ўтганди ва уларда фақат ҳужжатлар билан боғлиқ муаммолар қайд қилинганди). Айтиш мумкинки, ОЧЛда ҳар доим 4та ўринга эга бўлиб келган Эрон ўтган бор-йўғи "2+2" кўринишида квотага эга бўлганди. Бу ҳолат уларга ижобий таъсир кўрсатган шекилли, уларда ҳам ўсиш борлиги кўзга ташланган.

Юртимиз футболи билан таққослаганда, қайсидир йўналишларда Эрон устунликка эга бўлса, айрим соҳада Ўзбекистон яхшироқ кўрсаткичга эга бўлиб чиқмоқда. Масалан, ўзбек клубларининг барчаси молиявий ҳужжатларни ОФК комиссиясига тақдим қилган бўлса, Эрон клубларининг ярми бундай ҳужжатни топширган.

Лекин эронликлар миллий чемпионат ўйинларига ташриф буюрадиган мухлисларнинг ўртача сони бўйича бизга нисбатан устунликка эга — ҳар бир ўйинга ташриф буюрадиган мухлислар сони 10000дан ортиқ. Шунингдек, Эрон техник стандарт (максимал 200 балл) бўйича Ўзбекистонни 30 очкога ортда қолдирган. 

Умумий тўпланган баллар бўйича Ўзбекистон ўтган йили Эронни 3 баллга ортда қолдирганди. Шунингдек, Эрон ўтган йилги текширувга кўра бир нечта критерияларни бажара олмаганди. Ўзбекистон ўтган йили барча талабларни тўлиқ бажарган бўлса, бу йил битта талабни ҳали тўлиқ бажара олгани йўқ. ЎзПФЛ ўз логотипи ва уни клублар формаларига жойлаштириш бўйича ўз низомига ҳамда Лига ва клублар логотиплари туширилган маҳсулотларни сотиш бўйича марказлаштиилган стратегияга эга эмас.

ЎзПФЛда маркетинг бўлими фаолият юритмоқда ва у ОФК қўйган муддат — 8 октябрга қадар ушбу талабни бемалол бажарса бўлади.

Ана шу талаб бажарилса, Ўзбекистон ва Эрон футбол лигалари тўплайдиган балл бир-биридан катта фарқ қилмайди.