"Сурхон"нинг россиялик ярим ҳимоячиси Тамирлан Жамалутдинов клуб матбуот хизматига интервью берди.

— Тамирлан, «Турон»га қарши бўлиб ўтган ўйин ҳақида гапириб берсангиз...
— Рақиб — жуда кучли жамоа. Аутлари ва бурчак зарбалари эвазига улар биринчи таймда бизни бир муддат ортда қолдиришди. Қўшимча қилиш керакки, ҳар бир тур ўтган сари ўйинимиз яхшиланиб боряпти. Биз кўп имкониятларни ташкил қилдик, чиройли комбинациялар уюштирдик. Голимизни кеч киритдик. Агар олдинроқ гол урганимизда, ғалаба учун кураш олиб боришимиз мумкин эди. Лекин рақибда ҳам яхши вазиятлар бўлди. Ўйин тенг бўлди. Биз ғалаба қозонишимиз ҳам, ютқазишимиз ҳам мумкин эди. Ҳар ҳолда кучли рақибдан меҳмонда 1 очко ишлаб олдик. Бу ҳам ёмон натижа эмас.

— Кўпчилик иккинчи бўлимда «Сурхон» яхшироқ ўйнай бошлаганини таъкидламоқда. Танаффусда мураббийлар штаби футболчиларга нима деди?
— Ҳа, иккинчи бўлимда фаоллашдик. Биз 0:1 ҳисобида ютқазаётгандик. Бунга қарамасдан ғалаба қозонишни истардик. Мураббийлар штаби бизга кўпроқ ҳужум қилиш кераклигини айтишди. Биздан тажовузкорроқ ўйнашни сўрашди. Машғулотларда кўрсатилган ишланмалардан фойдаландик. Катта хоҳиш туфайли характер кўрсатдик ва таблода дуранг қайт этилди.

— «Турон»га қарши ўйин кунида Шоҳжаҳон Султонмуродовнинг туғилган куни бўлди. Жамоа уни қандай табриклади?
— Албатта, биз уни ғалаба билан табрикламоқчи эдик. Лекин шуни айтиш керакки, жамоа уни чин дилдан табриклаб, энг яхши тилакларини изҳор этди.

— Тамирлан, Ўзбекистон футболи ҳақидаги илк таассуротларингиз қандай?
— Таассуротлар ижобий. Майдонларнинг сифати ёқди менга. Ўзбекистонда инсонлар футболни севишини кўриш мумкин. 20 ёшгача бўлган Ўзбекистон терма жамоаси Осиё Кубогида ғалаба қозонди, бу эса ўзбек футболига қизиқиш уйғотмоқда. Суперлиганинг савияси ҳам яхши. Ҳамма ҳужумкор футбол ўйнашга ҳаракат қилмоқда. Кўп техник ва тезкор футболчиларни кўрдим.

— Бу йил «Сурхон» мухлислари жамоадан нимани кутишлари керак?
— Биз ҳар бир ўйинда қўлимиздан келганини ҳаракат қиламиз ва ҳар бир ўйинда максимал очколарни қўлга киритамиз.