Бугун Эркаклар терма жамоалари ўртасида норасмий жаҳон чемпионати - Девис кубоги мусобақаларининг навбатдаги босқич учрашувлари бошланди. Жаҳон лигасида ярим финал ўйинлари бўлиб ўтаётган бўлса, қолган минтақаларда плей-офф учрашувлари бўлиб ўтмоқда.

Ўзбекистон терма жамоасининг биринчи рақамли ракеткаси Денис Истомин қозоғистонлик Евгений Королёвга қарши кортга чиқди. Дунё рейтингида 269-ўринни эгаллаб турган Королёв кутилмаганда Истоминга жиддий қаршилик кўрсатди.

Рақиблар кетма-кет сетларда ғалаба қозониб боришди. Дастлаб ўзбекистонлик теннисчи Королёвни 6-3 ҳисобида мағлуб этди. Иккинчи сетда эса қозоғистонлик спортчи Истомин геймини ютиб олган бўлса, кейинчалик ҳамюртимиз брейкка брейк билан жавоб қайтарди. Яна бир брейк эса Евгенийга сет ғолиблигини тақдим этди.

Денис учинчи сетни қанчалик осон ютиб олган бўлса (6:2), тўртинчи сетда бундан ҳам осонлик билан имкониятни бой берди (0:6).

Ҳал қилувчи сетда эса Денис ўз тажрибасини ишга солди ва 6:3 ҳисобида ғалаба қозонди. Якуний ҳисоб — 3:2 (6:3, 4:6, 6:2, 0:6, 6:3). Биринчи ўйиндан кейин Ўзбекистон терма жамоаси 1:0 ҳисобида олдинга чиқиб олди.

Энди Фаррух Дўстов Қозоғистоннинг биринчи рақамли теннисчи Кукушкинга қарши баҳс олиб боради.