Аргентина терма жамоаси машғулот ўтказадиган базаси Лионель Месси шарафига ўзгартирилди. Бу ҳақда Аргентина футбол ассоциацияси раҳбари Клаудио Тапиа маълум қилди.
"Биз ўз базамизда тарихий кунни бошдан кечирдик, бугундан бошлаб бу маскан дунёнинг энг яхши футболчиси Лионель Месси номи билан аталади", - деб ёзди Тапиа ижтимоий тармоқда.
Эслатиб ўтамиз, декабрь ойида Аргентина терма жамоаси жаҳон чемпиони бўлганди. Жаҳон чемпионати финалида аргентиналиклар 3:3 ҳисобида дуранг ўйнаган Францияни пенальтилар сериясида мағлуб этди. Лионель Месси турнирнинг энг яхши футболчиси деб топилди.
Қўшимча қиламизки, Лионель Месси 2023 йилги "Олтин тўп" учун асосий даъвогар ҳисобланади.
