Ҳиндистон ўсмирлар терма жамоаси БААдаги йиғин доирасида ўзининг учинчи ўртоқлик ўйинини ўтказди. Бу сафар ҳам улар Амирлик футболчиларига қарши тўп суришди. Ўйинда БАА ўсмирлари 3:2 ҳисобида ғалаба қозонишди.

Ҳисобни ҳиндистонлик Лалампҳуя 25-дақиқада очди. Биринчи бўлим сўнгида мезбонлар 2та гол уриб, ҳисобда олдинга чиқиб олишди.

Иккинчи бўлим бошида Ален Дерой ҳисобни тенглаштирди. Ўйин тугаши арафасида эса БАА футболчилари ғалаба тўпини киритишди.

Таъкидлаш лозим, ҳиндистонликлар БААдаги илк назорат ўйинида маҳаллий футбол академияси тарбияланувчиларини мағлуб этган бўлсалар (4:1), БАА ўсмирларига қарши биринчи ўйинда ютқазишганди (1:2).

Ҳиндистон терма жамоаси Осиё чемпионатидаги илк ўйинни 23 сентябрь куни Ўзбекистонга қарши ўтказади.