Карло Анчелотти "Реал"да қолишни исташини такрорлашдан чарчамайди. Италиялик мутахассиснинг Мадриддаги амалдаги шартномаси 2024 йилнинг ўрталарига қадар мўлжалланган, аммо "қаймоқранглилар" келаси ёзда мураббийни алмаштириши мумкинлиги ҳақида маълумотлар бор.

Агар "Реал" ҳақиқатан ҳам Анчелоттини ишдан бўшатиб юборса, у ҳолда мутахассис Бразилия терма жамоасини бошқаради.

The Athletic нашрининг Анчелоттига яқин манбаларига таяниб хабар беришича, италиялик мураббий бундай вазифани бажаришга тайёр.

Бир неча кун олдин Бразилия футбол федерацияси раҳбари Эднальдо Родригес бу миш-мишларни авж олдирганди. Унинг таъкидлашича, Анчелотти "Реал"ни тарк этса Бразилия терма жамоаси бошқарувига яққол номзод бўлади.