"Реал" "Бавария" бош мураббийи этиб тайинланишидан олдин немис бош мураббийи Томас Тухелга қизиқиш билдирган, дея хабар беради Relevo.
Манбанинг хабарига кўра, испан клуби раҳбарияти жорий мавсум якунида "Реал"ни тарк этиши мумкин бўлган Карло Анчелоттига ўринбосар қидирмоқда. Қайд этилишича, эндиликда “қаймоқранглилар” бош мураббийлиги учун асосий давогар “Тоттенхэм” ва “ПСЖ”нинг собиқ бошқарувчиси Маурисио Почеттино ҳисобланади. Анчелоттининг мумкин бўлган ворислари рўйхатида иккинчи ўринда "Кастилья" устози Рауль жойлашган.
Эслатиб ўтамиз, Тухель 24 март куни “Бавария” бошқарувига тайинланган эди. У аввалроқ Лондоннинг “Челси” клубида ишлаган, ўтган йилнинг сентябрь ойи бошида у жамоадан бўшатилган эди.
Испания чемпионатининг 26-туридан кейин "Реал" биринчи ўринда турган "Барселона"дан 12 очкога ортда қолиб, турнир жадвалида иккинчи ўринда бормоқда.
