«Наполи» ярим ҳимоячиси Хвича Кварацхелия Италия А Сериясининг март ойидаги энг яхши футболчиси деб топилди. Бу ҳақда лига расмий сайти хабар берди.
Кварацхелия 2 апрель, якшанба куни «Наполи»нинг «Милан»га қарши ўйини олдидан эсдалик мукофотини олади.
Сўнгги бир ой ичида Хвича Италия чемпионатининг учта ўйинида иштирок этди. Уларда 22 ёшли грузиялик футболчи иккита гол урди ва битта голли узатмани амалга оширди.
Айни дамда «Наполи» А Серияда «Лацио»дан 19 очко олдинда бормоқда. Неаполликлар 1990 йилдан бери биринчи марта Италия чемпиони бўлишлари мумкин.
