"Арсенал" Emirates стадионига кўчганидан бери илк бор апрель ойида ҳам етакчиликни ушлаб турибди. Барча, тўпчиларнинг кейинги тақдири нима бўлишига қизиқмоқда. Микель Артета шогирдлари мавсум охирига қадар совуққонликни ушлаб қола оладими? Албатта, бу жуда катта жумбоқ бўлиб турибди. "Манчестер Сити" қийин ўйинда "Ливерпул"ни таслим этиб, орадаги фарқни 5 очкогача қисқартирган эди. Аммо кўп ўтмай, "Арсенал" 8 очколик фарқни яна тиклади. Ҳар икки жамоа рақибларини 4-1 ҳисобида мағлуб этди. Охирги маротаба лондонликлар 2007-2008 йилги мавсумда 29 та турдан кейин ҳам етакчилик қилган. Қуйида "Арсенал"нинг АПЛ тарихидаги етакчилик қилган йилларига назар ташлаймиз.
2003-04
Барча "Арсенал" шайдолари ўша мавсум қандай тугаганидан хабардор. Венгер шогирдлари февраль ойида етакчилик қилиб, бу устунликни мартда ҳам сақлаб қолади. 1-1 ҳисобидаги "МЮ" билан дуранг, 9 талик ғалабали серияни бузиб қўяди. Аммо мағлубиятсиз мавсумга таъсир этмайди. Апрелда тўпчилар ЕЧЛ ва Англия кубоги мусобақасидан "Челси" ва "МЮ" томонидан чиқариб юборилади. Бироқ, АПЛдаги зафарли юришлар давом этади. Арсен Венгер сўнгги 8 та турнинг 4 тасини дуранг билан якунлайди. Шунга қарамай, мавсум мағлубиятсиз, энг яқин таъқибчи бўлган "Челси"дан 11 очко олдинда якунланади.
2002-2003
2002-03 йилги мавсумни "Арсенал" қолган жамоаларга қараганда кўпроқ вақт топ-поғонада ўтказган. Венгер жамоаси ноябрдан то апрелга қадар етакчи мақомида бўлади. Пасайиш апрель аввалидан бошланади. 1-1 ҳисобида "Астон Вилла" билан дуранг, очко йўқотиш эстафетасини бошлаб берганди. Шундан кейи 2-2 ҳисобида "МЮ" билан яна бир дуранг қайд этилди. "Лидс"га май ойида, уйда 3-2 ҳисобида имконият бой берилади. Ҳа, мавсум кейинчалик "Саутгемптон" (6-1) ва "Сандерленд" (4-0) билан йирик ғалабалар қозонган ҳолда тугатилган. Бироқ, анча кеч эди. Негаки, "МЮ" 5 очко ўзиб кетишга улгурганди.
2001-2002
Ушбу мавсумда январь ойи давомида 4-ўрин банд этиб турилганди. Аммо 13 та ўйинда кетма-кет ғалаба қозониш, жамоани етакчига айлантиради. Сильвен Вильторднинг "Олд Траффорд"даги афсонавий голи АПЛ чемпионлигини расмийлашишига олиб келади.
1998-1999
Дастлабки 5 ўйиннинг фақат биттаси ғалаба билан якунланади. Ноябрь-декабрь ойлари "Арсенал" учун омадсиз келади. Шунга қарамай, Венгер йигитлари Роджестводан кейин ўнгланиб, катта муваффқиятга эришади. "МЮ" билан ўртадаги фарқ анча қисқаради. Апрель ойида "қизил иблислар" қувиб ўтилади. Афсуски, сўнгги турлардаги муваффақиятсизликлар тўпчиларга қимматга тушади. Мавсум Фергюсоннинг зафари билан тугайди.
1997-1998
"Уимблдон" устидан қозонилган ғалаба 10 сериялик ғалабанинг еттинчиси эди. Апрелда "МЮ" ортда қолдирилади. "Барнсли", "Дерби" ва "Эвертон" устидан қозонилган ғалабалар "Арсенал"ни АПЛ даврида илк бор чемпионга айлантиради. Ўша мавсумнинг сўнгги иккита ўйини "Ливерпуль" (4-0) ва "Астон Вилла"га (1-0) мағлубият билан тугайди. Аммо бу натижалар ҳеч нарсани англатмас эди.
ИСМАТОВ Ж.
