Мадриднинг «Реал» клуби бош мураббийи Карло Анчелотти Бразилия терма жамоаси бош мураббийи лавозимига тайинланиши борасида ўз фикрларини билдириб ўтди.
Италиялик мутахассис Тите кетганидан сўнг «Пентакампеонлар» раҳбари лавозимига асосий номзод саналади.
Яқинда мутахассис келаси мавсум охиригача «Реал Мадрид»да ишлашни истаётганини, аммо Мадрид клубини тарк этгач, мураббийлик фаолиятини якунлашни режалаштирмаётганини айтди.
«Қаймоқранглилар» «Вальядолид» устидан 6:0 ҳисобида ғалаба қозонганидан сўнг, журналистлар Анчелоттидан унга Бразилиядан қўнғироқлар бўлган-бўлмагани ҳақида сўрашди:
«Йўқ, Бразилиядан ҳеч ким менга қўнғироқ қилмади ёки СМС ёзмади. Менинг рақамимни ҳамма ҳам билавермайди», – деди мураббий матбуот анжуманида.