“Аделаида Юнайтед”га қарши ОФК Чемпионлар лигачи чорак финали биринчи учрашуви арафасида “Бунёдкор” ўзининг австралиялик легионери Дэвид Карни билан хайрлашди. Бу ҳақда клуб расмий сайти хабар тарқатди.

"Яшил қитъа вакили “қалдирғочлар” сафига ушбу мавсум бошида келиб қўшилганди. Мураббийлар ва мухлислар ундан Ўзбекистоннинг амалдаги чемпиони манфаатларига хизмат қиладиган ёрқин ва самарали ўйинлар кутишган эди. Дэвид яхши ўйин кўрсатишга ҳаракат қилди. Бироқ айрим сабабларга кўра Карнининг Тошкентдаги фаолияти кутилганидек чиқмади. Қўшимчасига, ҳужумкор ҳимоячининг Австралия терма жамоаси ва клубда кўрсатган ўйинлари фарқли бўлиб, асосан мамлакатимиздан ташқарида вақт ўтказди".

"Дэвид Карниниг тажрибасига ва унинг қандай маҳоратга эга эканлигига шубҳа йўқ. Ушбу қийин вазиятда “Бунёдкор” ФК раҳбарияти ва Дэвид Карни ўртасида тузилган шартнома иккала томон розилигига кўра тўхтатилди. Энди футболчи озод агент мақомига эга ва у кейинги фаолиятини исталган жамоада давом эттириши мумкин".

“Бунёдкор” футбол клуби Дэвид Карнининг клубдаги меҳнати учун миннатдорчилик билдиради ва унинг кейинги фаолиятига омад ва зафарлар тилайди", деб ёзилади клуб расмий сайтидаги хабарда.