Мадриднинг «Реал» клуби ярим ҳимоячиси Лука Модрич клуб билан тузилган шартнома ҳолатидан ўзини ноқулай ҳис қилмоқда, дея хабар бермоқда Goal.
Манбага кўра, «Реал Мадрид» вакиллари 37 ёшли футболчи ёки унинг вакиллари билан шартномани узайтириш бўйича музокараларни бошлаш учун ҳалигача боғланишмаган.
Хорватиялик футболчи 2022/23 йилги мавсум якунланар экан, бу вазиятдан тобора хавотирга тушиб бормоқда.
«Реал Мадрид»да Модрич билан шартнома масаласи ҳозирча тўхтатиб қўйилган, чунки улар ҳали ҳам футболчининг ёши ва клубдаги мақомидан келиб чиққан ҳолда янги таклифни ўйлаб кўришмоқда.
Модрич 2012 йилдан бери «Реал»да ўйнамоқда. 2022/23 йилги мавсумда у жамоа сафида барча мусобақаларда 37 та ўйинда майдонга тушиб, 6 та гол урди ва 5 та голли узатмани амалга оширди.
