Лионель Месси "Барселона"га қайтадиган бўлса, клуб бош мураббийи Хави уни қайси позицияда ўйнатиш масаласини футболчи билан муҳокама қилмоқда. Бу ҳақда журналист Гильем Балаге хабар тарқатди.

«Лео ва Лапорта ҳозирча ўзаро гаплашишмади. Аммо «Барселона» Мессини ортга қайтаришни режалаштирмоқда. Бош мураббий Хави эса Месси билан мунтазам гаплашиб турибди ҳамда жамоага унинг хизматлари керак эканини аниқ-равшан тушунтириб бермоқда.

Хави Леони таянч ярим ҳимоячисидан олдинги икки ярим ҳимоячилардан бири сифатида ўйнатмоқчи. Месси Аргентина терма жамоасида шунга яқин позицияда ўйнаганди. Бунинг учун Хави турли ғояларни ўйлаб қўйди. Лионель мураббийнинг фикрларини ҳар сафар тинглаганда кўзлари порлаб кетмоқда.

Аммо "Барса" раҳбариятининг матбуотдаги фикрларини ўқиб, ҳафсаласи пир бўлаётган бўлиши мумкин», – дея ёзди Балаге.