Европа Чемпионлар лигасининг чорак-финалида фантастик тўқнашув бор. Бу сешанба куни бўлиб ўтадиган "Манчестер Сити" ва "Бавария" ўртасидаги ўйиндир. Ҳар икки томон ҳам мавсумни фаворит сифатида бошлаган эди. Ҳозир ҳам бу борада ҳеч нарса ўзгаргани йўқ. Хусусан, бу жамоалар ўз ички чемпионатларида яхши имкониятга эга бўлиб турибди. Табиийки, икки томоннинг ҳам ЕЧЛни чорак финалда тугатиш режаси мавжуд эмас. Аммо улардан бири турнирни тарк этиши лозим. Қуйида ушбу учрашувга доир энг муҳим ва қизиқарли маълумотлар тақдим этилади.
Жамоалар қаерда учрашади?
Жой: Манчестер, Англия
Стадион: "Etihad"
Вақт: 11 апрель, сешанба
Старт: маҳаллий вақт билан 20:00, Тошкент вақти билан 00:00
Бош ҳакам: Хесус Хиль Мансано (Испания)
VAR: Хуан Мартинес Мунуэра (Испания)
Ўзаро ўйинларда:
"Манчестер Сити" – 3 та ғалаба
"Бавария" – 2 та ғалаба
Сўнгги тўқнашув: "Ман Сити" 3, "Бавария" 2. (2014 йил, ноябрь)
Жамоалар спорт формаси(охирги 5 та):
"Ман Сити" – 5 та ғалаба
"Бавария" – 3 та ғалаба, 2 та мағлубият
"Манчестер Сити" ҳақида
"Шаҳарликлар" сафида ҳужумчи Фил Фоден баҳсни ўтказиб юборади. У яқинда жарроҳлик амалиётини (кўричак ташхиси билан) бошидан ўтказган эди. Шунга қарамай, "Манчестер Сити" тўлиқ куч билан майдонга тушади. Гвардиола жамоаси "Саутгемптон"га қарши ўйинда бир нечта юлдуз футболчиларига дам олиш имконини берганди. Хусусан, Эрлинг Холанд "Бавария" билан ўйинларда ажойиб натижага эга. У сўнгги 7 та баҳсда мюнхенликлар дарвозасига 5 та тўп киритган.
"Бавария" ҳақида
Жоау Канселу ўз жамоасига қарши ўйинда иштирок этиши мумкин бўлади. Негаки, УЕФА аввалги, ижарачи клуб сафида, асл жамоасига қарши майдонга тушмаслик қоидасини бекор қилди. Аммо Канселу ўйинни захирада бошлаши кутилмоқда. Негаки, "Бавария" асосий таркибига Дайо Упамекано яна қайтди. Бенжамин Павар эса ўнг қанотдан жой олади. Садио Мане, Серж Гнабри ва Жамал Мусиалалар "Фрайбург" билан баҳсда майдонда ҳаракат қилган. Улар эртанги баҳсга ҳам тайёр бўлади. Жамоага ёрдам бера олмайдиганлар рўйхатида Мануэль Нойер, Лукас Эрнандес, Матис Тель ҳамда Эрик Шупо-Мотинглар бор.
Тахминий таркиблар:
"Ман Сити" – Эдерсон, Аканжи, Диас, Аке, Стоунз, Родри, Силва, Гюндоган, Де Брюйне, Грилиш, Холанд.
"Бавария" – Зоммер, Павар, Упамекано, Де Лигт, Девис, Киммих, Горецка, Гнабри, Мусиала, Сане, Мюллер.
Ушбу тўқнашувда аввалдан ҳисобни тахмин қилиш жуда ҳам қийин. Негаки, ҳар икки томон Европанинг энг яхши клублари саналади. Спорт формасига кўра, "Манчестер Сити" ўйин учун яхшироқ даражада етиб келди. Шу сабабдан, уй омилини ҳисобга олган ҳолда айтиш мумкинки, "шаҳарликлар" ғалабага эришса керак.
Тахминий ҳисоб: 3-2, "Манчестер Сити" фойдасига.
ИСМАТОВ Ж.
