Yevropa Chempionlar ligasining chorak-finalida fantastik to‘qnashuv bor. Bu seshanba kuni bo‘lib o‘tadigan "Manchester Siti" va "Bavariya" o‘rtasidagi o‘yindir. Har ikki tomon ham mavsumni favorit sifatida boshlagan edi. Hozir ham bu borada hech narsa o‘zgargani yo‘q. Xususan, bu jamoalar o‘z ichki chempionatlarida yaxshi imkoniyatga ega bo‘lib turibdi. Tabiiyki, ikki tomonning ham YECHLni chorak finalda tugatish rejasi mavjud emas. Ammo ulardan biri turnirni tark etishi lozim. Quyida ushbu uchrashuvga doir eng muhim va qiziqarli ma’lumotlar taqdim etiladi.
Jamoalar qayerda uchrashadi?
Joy: Manchester, Angliya
Stadion: "Etihad"
Vaqt: 11 aprel, seshanba
Start: mahalliy vaqt bilan 20:00, Toshkent vaqti bilan 00:00
Bosh hakam: Xesus Xil Mansano (Ispaniya)
VAR: Xuan Martines Munuera (Ispaniya)
O‘zaro o‘yinlarda:
"Manchester Siti" – 3 ta g‘alaba
"Bavariya" – 2 ta g‘alaba
So‘nggi to‘qnashuv: "Man Siti" 3, "Bavariya" 2. (2014 yil, noyabr)
Jamoalar sport formasi(oxirgi 5 ta):
"Man Siti" – 5 ta g‘alaba
"Bavariya" – 3 ta g‘alaba, 2 ta mag‘lubiyat
"Manchester Siti" haqida
"Shaharliklar" safida hujumchi Fil Foden bahsni o‘tkazib yuboradi. U yaqinda jarrohlik amaliyotini (ko‘richak tashxisi bilan) boshidan o‘tkazgan edi. Shunga qaramay, "Manchester Siti" to‘liq kuch bilan maydonga tushadi. Gvardiola jamoasi "Sautgempton"ga qarshi o‘yinda bir nechta yulduz futbolchilariga dam olish imkonini bergandi. Xususan, Erling Xoland "Bavariya" bilan o‘yinlarda ajoyib natijaga ega. U so‘nggi 7 ta bahsda myunxenliklar darvozasiga 5 ta to‘p kiritgan.
"Bavariya" haqida
Joau Kanselu o‘z jamoasiga qarshi o‘yinda ishtirok etishi mumkin bo‘ladi. Negaki, UYEFA avvalgi, ijarachi klub safida, asl jamoasiga qarshi maydonga tushmaslik qoidasini bekor qildi. Ammo Kanselu o‘yinni zaxirada boshlashi kutilmoqda. Negaki, "Bavariya" asosiy tarkibiga Dayo Upamekano yana qaytdi. Benjamin Pavar esa o‘ng qanotdan joy oladi. Sadio Mane, Serj Gnabri va Jamal Musialalar "Frayburg" bilan bahsda maydonda harakat qilgan. Ular ertangi bahsga ham tayyor bo‘ladi. Jamoaga yordam bera olmaydiganlar ro‘yxatida Manuel Noyer, Lukas Ernandes, Matis Tel hamda Erik Shupo-Motinglar bor.
Taxminiy tarkiblar:
"Man Siti" – Ederson, Akanji, Dias, Ake, Stounz, Rodri, Silva, Gyundogan, De Bryuyne, Grilish, Xoland.
"Bavariya" – Zommer, Pavar, Upamekano, De Ligt, Devis, Kimmix, Goreska, Gnabri, Musiala, Sane, Myuller.
Ushbu to‘qnashuvda avvaldan hisobni taxmin qilish juda ham qiyin. Negaki, har ikki tomon Yevropaning eng yaxshi klublari sanaladi. Sport formasiga ko‘ra, "Manchester Siti" o‘yin uchun yaxshiroq darajada yetib keldi. Shu sababdan, uy omilini hisobga olgan holda aytish mumkinki, "shaharliklar" g‘alabaga erishsa kerak.
Taxminiy hisob: 3-2, "Manchester Siti" foydasiga.
ISMATOV J.
