"Манчестер Юнайтед"нинг собиқ футболчиси Гари Невилл "Ливерпуль" ҳужумчиси Роберто Фирминонинг истеъдодини юқори баҳолади.
31 ёшли бразилиялик футболчи мавсум якунланганидан кейин эркин агентга айланади ва у "мерсисайдликлар" билан шартномасини узайтирмасликка қарор қилди. Ҳужумчи фаолиятини қаерда давом эттириши ҳозирча аниқ эмас.
Невилл Фирминонинг келажаги ҳақида ўз фикри билан ўртоқлашди: "Кимдир жуда юқори сифатли ўйинчи олади. Агар у Англияда қолишни истаса, АПЛнинг кучли олтилигидаги бошқа клубда ўйнаши мумкин эди. Менимча, Роберто ажойиб футболчи”, - деди Невилл Sky Sports телеканалида.
Роберто Фирмино жорий мавсумда 32 ўйинда 11 та гол урди ва 5 та голли узатмани амалга оширди.
