Мадриднинг “Реал” клуби марказий ҳимоячиси Давид Алаба ЕЧЛ чорак финалида “Челси”га қарши ўйиндан умидлари билан ўртоқлашди. Жамоалар ўртасидаги илк ўйин эртага "Сантьяго Бернабеу"да бўлиб ўтади.
“Чемпионлар лигасида биз босимни ҳис қиляпмизми? У ҳар доим бор, лекин бизга бу туйғу ёқади. "Реал Мадрид" дунёнинг энг катта клуби. Эртанги ўйин олдидан ўзимизга жуда ишонамиз ва ғалаба қозонишни истаймиз", - деди Алаба ўйин олдидан ўтказилган матбуот анжуманида.
"Реал Мадрид" ва "Челси" кетма-кет учинчи мавсумда Чемпионлар лигасида ўзаро тўқнаш келишади. Айни дамда Англия жамоаси ўз чемпионатида ўн биринчи ўринни эгаллаб турибди, "қаймоқранглилар" эса Ла Лигада иккинчи поғонани банд қилишмоқда.
