Хавьер Тебас Ла Лига вице-президенти бўлиб ишлаган вақтида "Мальорка"дан 200 минг евродан кўпроқ маблағ олган.
El Español нашри хабарига кўра, 2008 йилда ҳозирда Ла Лигани бошқараётган Тебас ўзининг Esfinge Veinte компанияси орқали "Мальорка"дан 232 минг евро олган. Менежер, Ла Лиганинг ўша пайтдаги вице-президенти "Аргентина бозорини тадқиқ қилиш ва скаутлик ҳисоботини тайёрлаш" учун маош олгани маълум бўлди.
Тебас "Мальорка" билан яқин муносабатда бўлган - Ла Лигада иш бошлашидан олдин у клуб вакили эди.
Тўловни ўша пайтда "Мальорка"ни бошқарган Педро Терраза амалга оширган. 2012 йилда у Тебас компаниясининг 15% улушини сотиб олди.
Бундан ташқари, Тебас ўз компаниялари орқали турли жамоаларнинг бир нечта ходимларига маслаҳат ва ҳисобот бериш учун пул олган. El Español маълумотларига кўра, бу тўловлар ҳеч қандай тарзда рўйхатга олинмаган.
