Xavyer Tebas La Liga vise-prezidenti bo‘lib ishlagan vaqtida "Malyorka"dan 200 ming yevrodan ko‘proq mablag‘ olgan.
El Español nashri xabariga ko‘ra, 2008 yilda hozirda La Ligani boshqarayotgan Tebas o‘zining Esfinge Veinte kompaniyasi orqali "Malyorka"dan 232 ming yevro olgan. Menejer, La Liganing o‘sha paytdagi vise-prezidenti "Argentina bozorini tadqiq qilish va skautlik hisobotini tayyorlash" uchun maosh olgani ma’lum bo‘ldi.
Tebas "Malyorka" bilan yaqin munosabatda bo‘lgan - La Ligada ish boshlashidan oldin u klub vakili edi.
To‘lovni o‘sha paytda "Malyorka"ni boshqargan Pedro Terraza amalga oshirgan. 2012 yilda u Tebas kompaniyasining 15% ulushini sotib oldi.
Bundan tashqari, Tebas o‘z kompaniyalari orqali turli jamoalarning bir nechta xodimlariga maslahat va hisobot berish uchun pul olgan. El Español ma’lumotlariga ko‘ra, bu to‘lovlar hech qanday tarzda ro‘yxatga olinmagan.