"Манчестер Сити" ҳужумчиси Эрлинг Холанд бир мавсумда АПЛдаги голлари сони бўйича Криштиану Роналду ва Луис Суаресни ортда қолдирди.
Ҳозирда норвегиялик футболчининг Англия чемпионатида 32 та голи бор. Роналду ва Суарес АПЛда бир мавсумда максимал 31 та гол уришган: “Манчестер Юнайтед”нинг собиқ футболчиси 2007/08 йилги Премьер-лигада рақиблар дарвозасига 31 марта аниқ зарба берган, “Ливерпуль”нинг собиқ ҳужумчиси эса 2013/14 йилги мавсумда худди шу кўрсаткични қайд этган.
Аввалроқ, 22 ёшли Холанд 2017/2018 йилги мавсумда 32 та гол урган Муҳаммад Салоҳнинг рекордини такрорлагани маълум бўлганди.
Умуман олганда, ҳужумчи жорий мавсумда “Манчестер Сити” сафида барча турнирларда 40 ўйинда 47 та гол урди ва 6 та голли узатмани амалга оширди.
