Бундан бир неча ой муқаддам Жюльен Дюранвиль номи ҳатто она-юрти Бельгияда ҳам кўпчиликка нотаниш эди.
Сентябрь ойи аввалида қайд этилган камёб натижа уни бутун мамлакатга танитди: 16 ёшли йигитча бир ҳафта ичида Бельгиянинг олий ва иккинчи дивизионларида ўзининг дебют голларини амалга оширди. Шу тариқа Жюльен 2006 йилда туғилган тенгдошлари орасида биринчи бўлиб гол урган футболчига айланди. Бундан ташқари, «Андерлехт»нинг энг ёш тўпурарлари рўйхатида 4, ўриндан жой олди.
Шундан кейин Дюранвиль асосий жамоа таркибида кўпроқ майдонга туша бошлади. Бироқ тез орада мушаклари шикастланиши оқибатида майдонга туша олмай қолди. Лекин унинг «Андерлехт» асосий таркибидаги 373 дақиқалик иштироки 2006 йилда туғилган ёш иқтидорлар ўртасида топ-лигалар ўнлигида пешқадам бўлиб олиши учун етарли бўлди. Қўшимчасига, уни ўз таркибига қўшиб олишга қарор қилган Дортмунднинг «Боруссия»си навқирон вингер учун 12,5 млн. евродан воз кечди. Вақти келиб, Дюранвиль бошқа жамоага сотиладиган бўлса, «Андерлехт» қўшимча даромадга эга бўлади.
Нима учун «Андерлехт» ўзининг энг зўр тарбияланувчисидан воз кечди ёки айнан ҳозир сотиб юборди?
Асосий сабаб шундаки, сўнгги йилларда Бельгиянинг энг номдор ва совриндор жамоаси молиявий муаммолар исканжасида қолган. Кўпмиллионли қарзлар, турли тўловлар ва бошқа харажатларни қоплаш учун спортдаги натижалардан олинаётган даромад камлик қилмоқда. Шундай мураккаб вазиятда иқтидорлар булоғи сифатида донг таратган машҳур академия тайёрлаб бераётган ноёб иқтидорларни сотишга тўғри келмоқда.
«Биз учун сотиб юборишни режалаштирмагандик. Бироқ клубимиздаги молиявий ҳолат шу қадар аянчлики, келишувларни амалга оширишга мажбур бўляпмиз» - айни пайтда «Андерлехт»нинг собиқ спорт директорига айланган Петер Вербекенинг мазкур эътирофи Дюранвиль ҳақида эмас, 2020 йилда «Ренн»га сотиб юборилган Жереми Доку ҳақида эди. Бироқ исм-шариф ва сананинг ўзгариши вазиятни ўзгартира олмайди. Бундан ташқари, «Андерлехт» уни иккинчи марта қўйиб юбормаётганини билганида, (дортмундликлар ўтган йил ёзида ҳам Жюльенга харидор бўлгандилар) Дюранвиль аввалги шижоати билан тўп сура олмаган бўларди. Юқорида зикр этилган мушаклар шикастланиши ҳам эътиборга молик жиҳат. Балки, бельгияликларни Дюранвилнинг Доку каби жароҳатга мойил эканлиги ташвишлантиргандир. Нима бўлганда ҳам, ёш иқтидорнинг саломатлиги - энди «Боруссия»нинг муаммоси. Жюльен тиббий кўрикдан ўтган - демак, ишга яроқли.
Ҳа, ҳозирча ютуқ «Андерлехт» томонида. Мухлислар Дюранвиль учун шунча маблағ ундирган янги спорт директори Йеспер Фредбергга таҳсин айтишмоқда. Лекин яқин келажакда Жюльен саломатлигини тиклаб, юксак салоҳиятини намойиш этганида, «Дортмунд»нинг зукколигидан ҳайратда қолишлари ҳеч гапмас.
Р.ИБРОҲИМОВ тайёрлади
