«Реал Мадрид» бош мураббийи Жозе Моуриньо футболдаги фаолиятини ҳали яна 20 йилдан ошиқроқ вақт мобайнида олиб бориш ниятида эканлигини айтди. Бу йўлда у шотландиялик мутахассис Сер Алекс Фергюсон даражасига чиқмоқчи. Эслатиб ўтамиз, «Манчестер Юнайтед» устози ҳозирда 70 ёшга кирди, мадридликлар устози эса январда 50 ёшни қаршилайди.

«Мен нима учун Сер Алекс Фергюсон бундай ёшда ҳам мукаммал иш олиб бораётганини яхши тушунаман. Ўйлайманки, мен ҳам ана шундай бўламан. Мен футболни, мураббийлик қилишни жуда қаттиқ севаман. Ҳозир элликка кираётган бўлсам ҳам ҳануз ўзимни ёш деб ўйлайман ва ҳали кўп ютуқлар олдимда эканлигига ишонаман. Эллик ёш, албатта, одамга таъсир қилади. Лекин у ҳам бир рақам. Менимча, бу рақам ҳаётни жуда қисқа деб ўйлаганларга салбий таъсир қилади».

«Мен учун эса 50 шунчаки рақам бўлиб, ортимга бир қараб қўйишга, кўпроқ ўйлашга ва келажак томон интилишга чорлайди холос. Ортимга қараб, эришган ютуқларим учун, худога раҳмат айтаман. Ҳозирги пайтда эса мен ўзимни аввалгидан ҳам кучлироқ ва тажрибалироқ деб ҳис қилмоқдаман ва ҳали ҳам профессионал фаолиятимнинг бошида турибман деб ўйлайман», дея Жозе Моуриньо Sky Sports га интервью берди.