25 сентябрь куни ҳар йили анъанавий тарзда ўтказилиб келинадиган мини-футбол бўйича Ассоцияция кубоги баҳслари старт олди. Таъкидлаш жоиз, бу йилги турнир ҳисоб бўйича саккизинчисидир.

Мазкур кубок баҳслари ҳар йили мини-футбол бўйича Ўзбекистон чемпионати бошланиши арафасида ўтказилиб келинади. Айнан шунинг учун ҳам, ушбу турнир чемпионат олдидан кўпгина жамоаларга ўз кучлари ва имкониятларини синовдан ўтказиб олиш имконини беради.

Бу йилги чемпионат баҳслари аввалгилардан анча қизиқарлироқ ўтиши кутилмоқда. Буни эса биринчи навбатда, амалдаги чемпион - Тошкентнинг «Ардус» клуби таркиби деярли 90%га ўзгаргани билан изоҳлаш мумкин. «Ардус» таркибида тўп суриб келган Ўзбекистон терма жамоасининг деярли барча ўйинчилари бу йилги мавсум старти олдидан ўз жамоаларини ўзгартиришди. Таъкидлаш керакки, айни дамда «Ардус» таркибида миллий терма жамоага номзод бўлган фақат уч футболчи қолган. Булар Дишлод Раҳматов, Жамолиддин Шарипов ҳамда дарвозабон Николай Кравченкодир.

Миллий терма жамоанинг асосий дарвозабони ҳисобланган Рустам Умаров ҳам «Ардус»ни тарк этиб «Локомотив» клуби сафига ўтди. Рустам Умаровдан ташқари «Ардус»дан «Локомотив» сафига шунингдек, Нодир Элибоев, Артур Юнусов ҳамда Константин Свиридовлар ҳам йўл олишган. Шундай қилиб, бир неча йиллардан буён мамлакатимизнинг энг кучли клубларидан бири бўлиб келган «Ардус» клуби раҳбарияти шу тариқа таркибни бироз ёшартиришга қарор қилишган.

Ўз таркибини миллий терма жамоанинг бир қатор футболчилари билан тўлдирган Тошкентнинг «Локомотив» клуби эса, янги бошланажак мавсумда чемпионлик учун асосий даъвогар сифатида тилга олинадиган бўлди. Ушбу жамоага асосий рақобатчи сифатида эса, Чирчиқ-Максам клубини тилга олиб ўтиш мумкин.

Шуни ҳам таъикдлаб ўтиш керакки, чемпионат старти олдидан ўтган мавсумда миллий чемпионатимизда иштирок этган беш нафар футзалчи ўз фаолиятларини Қозоғистон чемпионатида давом эттирадиган бўлишди. Дилшод Ирсалиев, Фарҳод Абумавлонов, Жавлон Аноров («Ардус»), Шуҳрат Тожибоев («Строитель-3») ҳамда «Локомотив» шарафини ҳимоя қилиб келган Олег Ҳолмуҳемедовлар ўз жамоаларини тарк этиб, Қозоғистон чемпионатига йўл олишган. Бу футболчининг барчаси эндиликда Олма-Отанинг «БТА Футзал» клуби шарафини ҳимоя қилишади.

Бевосита бу йилги Ассоцияция кубоги баҳсларига қайтадиган бўлсак, юқорида чемпионлик учун асосий даъвогарлар сифатида тилга олинган Тошкентнинг «Локомотив» ҳамда Чирчиқнинг «Чирчиқ-Максам» клублари ўзларига билдирилган ишончни тўла оқлаганини қайд этиб ўтиш лозим. Биринчи тур баҳсларида ҳар иккала жамоа ҳам ўз рақибларини бир хил - 7:1 ҳисобида мағлубията учратишди. Шунингдек, Тошкентнинг «Бунёдкор» клуби ҳам дастлабки турда йирик ҳисобда ғалаба қозонганини таъкидлаш жоиз. Тошкентликлар Бухоронинг «Когон» кубини 4:0 ҳисобида мағлубиятга учратишди.

Таркибини тубдан янгилаган «Ардус» ҳам дастлабки турда ўз рақибини йирик ҳисобда мағлубиятга учрата олди. «Ардус» Андижоннинг «Турон» клуби дарвозасига 8та жавобсиз тўп киритди.

«Ассоцияция кубоги - 2012» 1-тур натижалари ва 2-тур ўйинлари вақти билан танишинг:

25 сентябрь, Сешанба
10:00. Чирчиқ-Маскам – DHL 7:1
11:30. Локомотив – Гулистон 7:1
13:00. Бунёдкор – Когон 4:0
14:30. East Road – УзСҚБ 2:4
16:30. Ардус – Турон 8:0
17:30. Строитель-З – Наманган +:-

26 сентябрь, Чоршанба
10:00. DHL – Гулистон
11:30. Чирчиқ Максам – Локомотив
13:00. Когон – ЎзСҚБ
14:30. Бунёдкор – East Road
16:30. Турон – Наманган
17:30. Ардус – Строитель-З