"ПСЖ" ҳужумчиси Лионель Месси катта эҳтимол билан Париж клубини тарк этади. Бу ҳақда Mirror нашри хабар бермоқда.
Манбанинг хабарига кўра, парижликлар раҳбарияти аргентиналик футболчига шартномани узайтиришни таклиф қилишга шошилмаяпти. "ПСЖ" президенти Носир Ал-Хелайфий клубнинг ривожланиш лойиҳасини франциялик ёш истеъдодларни қўлга киритишга қаратмоқчи. Режага кўра, парижликлар юлдуз футболчилар билан шартнома имзолашга интилмайди.
Мессининг келажаги уни қайтариб олмоқчи бўлган "Барселона"нинг молиявий имкониятларига боғлиқ. Футболчининг "ПСЖ" билан шартномаси шу йилнинг июнь ойида якунига етади. 35 ёшли Месси фаолиятида иккинчи марта эркин агентга айланиши мумкин.
