Ўзбекистон U-20 терма жамоаси Аргентинада ўтадиган Жаҳон чемпионати олдидан Уругвай билан ўртоқлик ўйини ўтказади. Бу ҳақда ЎФА матбуот хизмати маълум қилди.

Равшан Ҳайдаров қўл остидаги жамоа кичик мундиал олдидан Уругвай мамлакатида йиғин ўтказади. Ушбу йиғин доирасида ўзбекистонлик ёш футболчилар Уругвайга қарши ўртоқлик ўйинида иштирок этади. Учрашув 13 май куни бўлиб ўтади.

Маълумот учун, Уругвай ёшлари U-20 Жанубий Америка чемпионатида Бразилиядан ортда қолган ҳолда иккинчи ўринни қўлга киритган.

U-20 Жаҳон чемпионати 20 майдан 11 июнга қадар Аргентинада бўлиб ўтади. Ўзбекистон U-20 терма жамоаси мусобақанинг А гуруҳидан жой олган ва унда Аргентина, Гватемала, Янги Зеландия каби жамоалар билан ўйнайди.

Осиё чемпионлари 20 май куни мусобақанинг очилиш ўйинида Аргентинага қарши майдонга тушади. 23 майда Янги Зеландияга қарши ўйин ўтказса, 26 майда 3-тур доирасида Гватемала билан ўйнайди.

Айни вақтда Ўзбекистон U-20 терма жамоаси Испанияда йиғин ўтказмоқда. Жамоа 22 апрель куни Бразилияга қарши ўртоқлик ўйини ўтказиб, йирик ҳисобда ютқазди (1:4). Йиғин доирасида жамоани Доминикан Республикаси (25 апрель) ва Гибралтарга (27 апрель) қарши ўйинлар кутиб турибди.