O‘zbekiston U-20 terma jamoasi Argentinada o‘tadigan Jahon chempionati oldidan Urugvay bilan o‘rtoqlik o‘yini o‘tkazadi. Bu haqda O‘FA matbuot xizmati ma’lum qildi.

Ravshan Haydarov qo‘l ostidagi jamoa kichik mundial oldidan Urugvay mamlakatida yig‘in o‘tkazadi. Ushbu yig‘in doirasida o‘zbekistonlik yosh futbolchilar Urugvayga qarshi o‘rtoqlik o‘yinida ishtirok etadi. Uchrashuv 13 may kuni bo‘lib o‘tadi.

Ma’lumot uchun, Urugvay yoshlari U-20 Janubiy Amerika chempionatida Braziliyadan ortda qolgan holda ikkinchi o‘rinni qo‘lga kiritgan.

U-20 Jahon chempionati 20 maydan 11 iyunga qadar Argentinada bo‘lib o‘tadi. O‘zbekiston U-20 terma jamoasi musobaqaning A guruhidan joy olgan va unda Argentina, Gvatemala, Yangi Zelandiya kabi jamoalar bilan o‘ynaydi.

Osiyo chempionlari 20 may kuni musobaqaning ochilish o‘yinida Argentinaga qarshi maydonga tushadi. 23 mayda Yangi Zelandiyaga qarshi o‘yin o‘tkazsa, 26 mayda 3-tur doirasida Gvatemala bilan o‘ynaydi.

Ayni vaqtda O‘zbekiston U-20 terma jamoasi Ispaniyada yig‘in o‘tkazmoqda. Jamoa 22 aprel kuni Braziliyaga qarshi o‘rtoqlik o‘yini o‘tkazib, yirik hisobda yutqazdi (1:4). Yig‘in doirasida jamoani Dominikan Respublikasi (25 aprel) va Gibraltarga (27 aprel) qarshi o‘yinlar kutib turibdi.