Ўзбекистон Футзал Уюшмаси Кубоги баҳсларининг ярим финал иштирокчилари номи маълум бўлди.
28 сентябрь куни ўтказилган мусобақанинг чорак финал беллашувлари анчагина кескин ва муросасиз тарзда кечди. Дастлаб, “Ўзбекистон” спорт мажмуасининг футзал майдонига Тошкентнинг “Локомотив” ва ЎзҚСБ жамоалари чиқишди. Қизиқарли учрашув “темирйўлчилар” фойдасига ҳал бўлди – 2:0.
Куннинг энг голларга бой учрашуви “Ардус” ва “Турон” клублари ўртасида бўлиб ўтди. Унда Ўзбекистон чемпионатининг амалдаги ғолиби “Ардус” андижонлик рақибидан 7:4 ҳисобида устун келди. Айтиш жоизки, ушбу жамоалар гуруҳ баҳслари доирасида ҳам дуч келишган эди ва ўшанда “Ардус” футболчилари “Турон” дарвозасига жавобсиз 8та гол уришган эди.
Ҳаваскор жамоалар орасида фақатгин “East Road” клуби ярим финал йўлланмасини қўлга киритишга муваффақ бўлди. “Гулистон”га қарши кечган ўйинда “East Road” сирдарёликларни қийинчилик билан бўлсада таслим қила олди – 5:4.
Чорак финал беллашувларини “Чирчиқ Максам” ва “Бунёдкор” клублари ўртасидаги ўйин якунлаб берди. Мазкур баҳс қолган 3та ўйин каби қизиқарли тарзда кечди ва оҳир оқибат унда чирчиқлик спортчилар 3:2 ҳисобида ғалаба қозонишга эришдилар.
Демак, бугун – 29 сентябрь куни мусобақасининг ярим финал учрашувларида “Локомотив” – “East Road” ҳамда “Ардус” – “Чирчиқ Максам” жуфтликлари майдонга чиқишади. Баҳслар соат 14:00 ва 16:00да бошланади.
