АПЛ доирасидаги «Ливерпуль» ҳамда «Тоттенхэм» учрашуви драматик тарзда кечди.
Юрген Клопп шогирдлари 15-дақиқа охирига келиб рақибни 3:0 ҳисобида мағлуб этаётганди, аммо лондонликлар ўйинга қайтишга куч топдилар.
Ришарлисон «шпорлар»нинг учинчи голини урганида кўпчилик ўйин дуранг билан якунланишига ишонишганди. Бироқ «қизиллар» ғалабани тортиб олишга муваффақ бўлишди – Диого Жота гол урди.
«Ливерпуль» бош мураббийи Юрген Клопп жамоасининг тўртинчи голидан сўнг ҳиссиётларга тушиб, захира ҳакамига яқинлашиб, унга нимадир деди.
Шундан сўнг, немис орқага қайтди ва унинг сон мушаклари тортишиб қолди. Клопп бирдан майдонни оқсоқланган ҳолда тарк этди. Айтганча, Юрген ҳиссиётлар учун сариқ карточка олди.
