"Ювентус" молиявий директори Франческо Кальво Массимилиано Аллегри билан боғлиқ вазият ҳақида гапирди.
Сўнгги ҳафталарда Италия ОАВлари жамоанинг жорий мавсумдаги энг яхши натижалари бўлмагани учун Турин клубининг мутахассис билан хайрлашиши мумкинлиги ҳақида тез-тез хабар бериб келмоқда.
"Айтишим мумкинки, Аллегрининг позициясига ҳеч қандай шубҳа йўқ, бу жуда аниқ. У тўрт йиллик шартнома билан қайтди ва ҳозирча унинг ярмини ҳам бажармади. Массимилианонинг ўтмишдаги ютуқлари ўзи гапиради, биз унга ишонамиз. Бу мавсумдаги мақсадларимиз А Серияда иккинчи ўринни эгаллаш ва Европа Лигаси финалида ўйнаш”, - дейди Кальво DAZN нашрига.
