Испания чемпионатининг 33-тури доирасида «Барселона» кеча ғалаба қозониб, "Реал" мағлубиятга учрагач, жамоалар орасидаги фарқ 14 очкога етди (82 ва 68 очко). Мавсум якунланишига эса 5 тур қолди.

"Мадрид" қолган ўйинларнинг барчасида ғалаба қозонса, ўз очколарини 83 тага етказади. Демак, "Барса" таъқибчи ета олмайдиган масофага бориши учун 2 очко етарли бўлади (нега 1 очко етарли эмас? Чунки очколар тенг бўлиб қолса "Реал"да ўзаро ўйинлардаги натижа бўйича устунлик бор — 3:1 ва 1:2).

Бундан ташқари, 3-ўринни эгаллаб турган "Атлетико" ҳисобида 66 очко бор. Симеоне жамоаси бугун "Эльче" устидан ғалаба қозонса, ўз очколарини 69 тага етказиб, жадвалда 2-ўринга кўтарилиб олади. "Атлетико" шундан кейин ҳам қолган ўйинларнинг барчаси ғалаба қозонса, максимал 84 очко жамғариши мумкин.

Юқорида "Барселона"нинг чемпионликни расмийлаштириши учун 84 очко етади дедик. Боиси, Хави жамоаси "матрасчилар"га қарши ҳар икки ўйинда ғалаба қозонишган.

«Барселона» кейинги турни 14 май куни «Эспаньол» майдонида ўтказади. Бу ўйиндаги ғалаба Хави ва унинг жамоасига 3 йиллик танаффусдан сўнг Испания чемпионлигини тақдим этади. Жамоа сўнгги марта мавсум-2018/2019 да Ла лига ғолибига айланганди.