"Монца"да ижара асосида ўйнаётган "Арсенал" ҳимоячиси Пабло Мари доимий равишда Италия клубига ўтади. Бу ҳақда журналист Фабрицио Романо хабар бермоқда.
Манбага кўра, инглиз клуби 29 ёшли испанияликни сотишдан 6 миллион фунт (тахминан 6,78 миллион евро) ишлаб олади. Шу билан бирга, Transfermarkt портали Марини 5 миллион еврога баҳоламоқда.
Жорий мавсумда ҳимоячи "Монца" таркибида 27 та ўйин ўтказиб, битта гол урган. Бунгача Мари "Удинезе", "Мальорка", "Жирона", "Фламенго" ва "Химнастик" клубларида ҳам тўп сурган.
Италия А сериясининг 33-туридан сўнг “Монца” 45 очко билан турнир жадвалининг 10-поғонасида бормоқда.
