Қатар миллий терма жамоаси бир ҳафталик йиғин ўтказиш мақсадида БААга йўл олди. Абу-Даби шаҳрида бўлиб ўтадиган йиғин 16 октябрь куни Ўзбекистонга қарши ўтадиган ўйинга тайёргарлик вазифасини ўтайди.

Қатар ярим ҳимоячиси Висам Ризиқ: "Тайёргарликнинг асосий қисмини шу ерда (Абу-Даби) ўтказмоқчимиз. Олдимизда муҳим ўйин турибди. Ўқув-машғулот базаси ходимлари футболчиларга шароит яратиш учун барча ишларни амалга оширишмоқда", дея таъкидлади.

"Қатар муҳим ўйинга тайёргарлик кўрмоқда. Бу саралашнинг ҳал қилувчи ўйинларидан бири. Футболчилар эътиборларини ушбу ўйинга қаратишлари лозим. Биз ижобий натижага умид қиляпмиз. ЖЧ-2014га боришни истаймиз", дейди Ҳусайн Али.

Қатар миллий терма жамоаси ва Ўзбекистон ўртасидаги ўйин 16 октябрь курни "Жасим бан Ҳамад" стадионида соат 15:30да бошланади.

"Ал-Анабий" номини олган қатарликлар ўтган ойда Тожикистон ва "Бавария"га қарши ўртоқлик ўйинларини ўтказиб, ҳар иккаласида мағлуб бўлди (1:2 ва 0:1). Терма жамоа аъзолари жума ва шанба кунлари Қатар юлдузлар лигаси баҳсларида майдонга тушишди ва якшанба куни Абу-Дабига етиб келишди. Терма жамоа ўйини муносабати билан миллий чемпионатда 20 октябрга қадар танаффус эълон қилинган.

Қатар терма жамоаси ўқув-машғулот йиғинида иштирок этаётган футболчилар рўйхати:
Қосим Бурҳон, Малик Баба, Ражаб Ҳамза, Аҳма Суфён, Месаад ал-Ҳамад, Ҳамид Исмоил, Муҳаммад Касола, Тоҳи Закариё, Холид Солиҳ, Иброҳим Мажид, Иброҳим ал-Ғаним, Маркони, Холид Муфта, Висам Ризиқ, Юнус Али, Талал ал-Блуший, Мажид Сиддиқ, Абдулла Толиб Афифа, Ҳусайн Али, Абдулазиз Ҳотам, Лоренс Куайе, Одил Лами, Фабио Сезар, Халфан Иброҳим, Ҳасан ал-Ҳайдаус, Муҳаммад ас-Сайид Жедду, Мажид Муҳаммад, Муҳаммад Раззоқ, Себастьян Сория, Жаралла ал-Марри, Юсуф Аҳмад.