Қашқадарё кубоги финалида “Насаф-Академия” Нишоннинг “Нуристон” жамоасига қарши куч синашиб, иродали ғалабага эришди.
Учрашувни фаоллик билан бошлаган ҳар иккала жамоа аъзолари дастлабки дақиқаларданоқ ҳужумкорликка берилишди. Учрашувнинг 24-дақиқасида “Нуристон” жамоаси аъзолари 11 метрлик жарима зарбасини тепиш ҳуқуқига эга бўлишди ва ҳисобни очишди – 0:1. Орадан бироз вақт ўтгач, аниқроғи 37- дақиқада “Нуристон” жамоаси жарима майдончаси ичида рақибга нисбатан ўйин қоида бузилди. “Нуқта”га яқинлаган жамоа сардори Ғолиб Ғайбуллаев ҳисобни тенглаштирди –1:1. Учрашувнинг асосий вақтида бошқа голлар киритилмади ва ўйин 1:1 ҳисоби билан якунланди.
Қўшимча бўлимларда ҳам ҳар иккала жамоа вакиллари бир қатор имкониятларга эга бўлишди. Қўшимча бўлимнинг сўнги дақиқаларида Нодир Санақуловнинг чамаси 18-метрлардан тепган зарбаси рақиб дарвозасидан ўрин олди ва "Насаф" Қашқадарё кубогини қўлга киритишди.
Қашқадарё кубоги. Финал
“Насаф-Академия” – “Нуристон” 2:1 (1:1)
Голлар: Ғолиб Ғайбуллаев (36-пенальтидан,) Нодир Санақулов (114),
“Насаф-Академия”: Азамат Аҳмедов, Ғолиб Ғайбуллаев, Одил Ҳамробеков, Мирзамурод Жўрабоев, Денис Қаюмов, Нодир Санақулов, Нажмиддин Нормуродов, Аброр Ёриев (Акбар Муродов 74), Наримон Ҳасанов, Азизбек Маликов, Дилшод Хушбақов (Даврон Ҳусанов 85)
Учрашувдан сўнг “Насаф-Академия” бош мураббийи Евгений Смирнов ўйин ҳақида ўз фикрларини билдириб ўтди:
-Учрашув биз кутгандан ҳам қийин кечди. Ўйин финалга мос бўлди. 120 дақиқа вақт давомида шогирдларим ҳамда рақиб жамоа аъзолари чиройли ва тажовузкор футбол намойиш этишди. Умуман шогирдларимни ҳаракатларидан қониқиш ҳосил қилдим. Бугунги ғалаба меҳнатларимизнинг самарасидир. Қашқадарё кубогини қўлга киритиш осон кечмади. Бу каби мусобоқада ғолиб чиқиш ҳар доим ҳам ёқимли бўлиб келган. Ғалаба билан барчани табриклайман.
