«Милан» ярим ҳимоячиси Сандро Тонали Чемпионлар лигаси яримфиналининг «Интер»га қарши жавоб ўйини олдидан бўлиб ўтган бугунги матбуот анжуманида эртанги баҳс ҳақида гапирди.
«Биринчи ўйинда кўрсатган натижамизни ўзгартира олмаймиз. Аммо иккинчи ўйинда биз хоҳлаган нарсага эришиш учун биргаликда ҳаракат қилишимиз керак ва бу ўз қўлимизда.
Биз ҳаммамиз эртанги ўйин муҳимлигини тушунамиз ва эртага «Милан» формасини кийган ҳар бир киши майдонда нима қилиши кераклигини билади», - дея Тоналининг сўзларини келтиради УЕФА матбуот хизмати.
Ярим финал жавоб учрашуви доирасидаги «Интер» ва «Милан» дербиси эртага, 16 май куни Милан дербисининг доимий аренаси – «Сан-Сиро» стадионида бўлиб ўтади.
