ЕЧЛнинг иккинчи финалчиси номини аниқлаш вақти келди. Бугун "Манчестер Сити" ўз уйида "Реал"ни қабул қилади. Бу жуфтлик ўртасида кечган бир ҳафта олдинги баҳс 1-1 ҳисобида якун топганди. Ўшанда Винисиус илк голни урган, ортидан Кевин Де Брюйне жавоб қайтарган эди. Шу сабабли бу баҳсда ҳали ҳеч нарса маълум эмас.
Пеп Гвардиола шогирдлари АПЛ чемпионлигига жуда яқин келиб турибди. "Реал" эса ички чемпионатда "Барселона"га имкониятни бой берди. Каталонияликлар ҳафта якунида чемпионликни нишонлаган эди. Эндиликда, "Реал" иккинчи ўрин учун "Атлетико" билан курашади. Қайд этиш керакки, бугунги баҳс ғолиби, финалда "Интер" билан тўқнаш келади. Кеча тунда "Милан" "аждаҳолар" томонидан икки ўйин натижасига кўра, 3-0 ҳисобида доғда қолдирилганди.
Жавоб ўйини олдидан Гвардиола ўз фикрларини билдириб ўтар экан, жумладан, шундай дейди: "Бу ўйин ҳал қилувчи аҳамиятга эга. Бунга шубҳа йўқ. Биз рақибга қарши ҳар бир чизиқда муносиб қаршилик кўрсата оламиз. Ҳужум услубимизни ҳам ўзгартиришимиз мумкин. Дастлабки, баҳсда рақиб ҳимоячилари Алаба ва Рюдигер Эрлинг Холандга ўта яқин ҳаракат қилди. Шу сабаб бўшлиқ топиш анча қийин ишга айланган эди. Энди майдондаги айрим нарсаларни ўзгартиришга мажбурмиз".
Шунингдек, Анчелотти ҳам бугунги баҳс борасида қисқача фикрларини баён этди: "Биз биринчи ўйинни назоратимизда ушлаб турган эдик. Рақиб тўпга эгалик қилганида, ҳимоядаги мувозанатга эътибор бердик. Кейин эса уларга ўйин бермай, рақибга муаммо туғдирдик. Шу йўсинда керакли натижага эриша оламиз деб ўйлайман".
Ўйин ҳақида
Жой: Манчестер, Англия
Стадион: "Etihad Stadium"
Вақт: 17 май, чоршанба
Старт: 20:00 маҳаллий вақт билан, 00:00 Тошкент вақти билан
Бош ҳакам: Шимон Марциняк (Польша)
VAR: Томаш Квиятковски (Польша)
Сўнгги бешта учрашувда:
"Реал"да 1 та ғалаба
"Манчестер Сити"да 3 та ғалаба
Дуранглар 1 та.
Жароҳатланганлар ҳақида
Гвардиола Родридан фойдалана олмаслиги мумкин. Испаниялик ярим ҳимоячи "Эвертон"га қарши баҳсда кичик жароҳат олган эди. Ўша баҳсда асосий фигуралар: Кевин Де Брюйне, Бернарду Силва, Жон Стоунз ва Жек Грилишлар захирада қолдирилган. Шундай экан, улар ўйинга тайёр бўлади. Ҳимоячи Натан Аке сон қисмидан жароҳат олиб, соғая бошлаган. Унинг қайтиши кутилмоқда.
"Реал"нинг муаммолари ҳам етарли. Жамоа муҳим фигураси бўлмиш Эдуардо Камавинга майдонга тушмаслиги мумкин эди. Футболчи "Хетафе" билан баҳсда жароҳат олганди. Аммо унинг қайтиши айтилган. Анчелотти учун муҳим бўлган Эдер Милитао сафга қайтади. У биринчи ўйинни дисфалификация сабабли ўтказиб юборишга мажбур бўлганди. Шунингдек, ҳимоячи Ферлан Менди ҳам жароҳатидан соғайган. "Реал" қолган барча муҳим футболчиларидан фойдаланиш имконига эга бўлади.
ИСМАТОВ Ж.
