Осиё Футбол Конфедерацияси Париждаги Олимпиадага саралаш ҳисобланган 2024 йилги 23 ёшли футболчилар ўртасидаги Осиё Кубоги ўйинлари санасини расман эълон қилди.
Турнир 15 апрель куни бошланиб, 3 май куни якунланади. Қатар бунга ўтган йили мезбон жой сифатида танланган эди.
Дастлаб 23 ёшлилар ўртасидаги Осиё Кубоги-2024 январь ойида бўлиб ўтиши керак эди. Аммо катталар ўртасидаги Осиё Кубоги 2024 йилнинг январь-февралига кўчирилиши муносабати билан 23 ёшлилар ўртасидаги Осиё кубоги вақтини ўзгартириш зарурати туғилди. Шу билан бирга, ОФК бир нечта омилларни ҳисобга олган ҳолда қарор қабул қилиши керак эди:
- Рамазон саналари (10 март - 10 апрель),
- Олимпиаданинг футбол турнирига қуръа ташлаш маросими (апрель ойининг боши).
Натижада муроса топилди ва мусобақа Рамазон ҳайитидан кейин дарҳол бошланади.
