12 октябрь куни БАА ва Ўзбекистон миллий терма жамоалари Дубай шаҳрида ўртоқлик учрашувини ўтказишади. Амирлик терма жамоаси ушбу ўйинга тайёргарликни 7 октябрь, якшанба куни бошлайди. Мазкур ўртоқлик учрашуви Ўзбекистон учун Қатарга қарши ЖЧ саралаш баҳсига тайёргарлик вазифасини ўтаса, БАА эса январь ойида Баҳрайнда ўтадиган Кўрфаз кубоги ва Осиё кубоги-2015 саралаш ўйинлари учун ҳозирлик вазифасини ўтайди.

Маҳди Али бошчилигидаги миллий терма жамоа 12 октябрь куни Ўзбекистон ва 16 октябрь куни Баҳрайн терма жамоалари билан ўртоқлик ўйинини ўтказиши боис, Пролигада 20 октябрга қадар танаффус эълон қилинган. БАА Ўзбекистонга қарши ўйинни Дубай шаҳридаги "Аш-Шабоб" клубига қарашли Рашид бин Мактум стадионида ўтказса, Баҳрайнга қарши ўйин эса "Ал-Васл" стадионида бўлиб ўтади.

"Ал-Аҳли" ҳужумчиси Аҳмад Халил жароҳати туфайли йиғинга таклиф этилмади. Узоқ муддатли танаффусдан кейин Амир Муборак ва Муҳаннад ал-Эназий терма жамоага жалб қилинди.

БАА миллий терма жамоасининг Ўзбекистонга қарши ўйинга таркиби:
Абдул Азиз Сангур, Абдул Азиз Ҳайкал, Исмоил ал-Ҳаммадий, Амир Муборак (барчаси — "Ал-Аҳли"), Амир Абдул Раҳмон, Муҳаммад Фавзи (иккиси — "Банияс"), Али Хасиф, Холид Иса, Али ал-Америй, Мабхут Али Абдулла Муса, Хамис Исмоил ("Ал-Жазийра"), Волид Аббос ("Аш-Шабоб"), Довуд Сулаймон Муҳаммад Аҳмад, Ал-Муҳаннад Эназий, Умар Абдулраҳмон ("Ал-Айн"), Ҳабиб ал-Фардан ("Ан-Наср"), Исмоил Матар, Ҳамдан ал-Камолий, Саид ал-Катирий ("Ал-Ваҳда"), Рашид Эйса ("Ал-Васл").