"Сурхон" клуби футболчиси Камрон Сайдазимов жамоасининг Суперлига доирасидаги "Металлург"га қарши ўйини олдидан ўз фикрларини билдириб ўтди.

— Камрон, аввало «Металлург»га қарши навбатдаги ўйинга тайёргарлик ҳақида гапириб берсангиз?
— Ҳар бир ўйиндан олдинги каби биз ҳам жисмоний, ҳам тактик тайёргарликка катта этибор берамиз. Жамоамиз ушбу баҳсда ғалаба қозониш ва 3 очкони қўлга киритиш учун ҳар куни машғулотлар олиб боряпмиз. «Металлург» – жиддий рақиб, жангавор жамоа. Бундай рақибга қарши осон бўлмайди, лекин бизнинг вазифамиз - фақат ғалаба.

— Жорий йилда жамоада Сергей Арслонов бошчилигидаги мураббийлар штаби фаолият юритмоқда. Ҳозирги мураббийлар билан ишлаш сиз учун қандай?
— Биринчи навбатда, биз билан ишлаётган мураббийларга ҳурматимни билдирмоқчиман. Мураббийлар штабининг услублари менга жуда ёқди. Биз жуда юқори малакали мутахассисларни тўпладик. Жамоамиз ҳужумкор футбол намойиш этади. Мураббийларимиз тактикада жуда илғор, улар футболчиларга заиф томонларини тўғри кўрсатишни биладилар. Биз уларнинг иши туфайли футболга профессионал ёндашув билан ҳаракат қиламиз.

— Мавсум бошланишини қандай баҳолайсиз?
— Турнир жадвалида 8-ўринда турибмиз. Бир томондан, бу ўтган йилга нисбатан олдинга қадамдир. Бошқа томондан, биз тўхташни хоҳламаймиз. Биз фақат ғалабалар учун курашмоқчимиз ва бизда мавсум якунида юқори ўринни эгаллаш истаги бор. Менимча, хурсанд бўлишга ҳали эрта. Олдинда муҳим учрашувлар бор ва биз кучли жамоа эканлигимизни исботлаб, мухлисларимизни хурсанд қилишимиз керак

— Шу кунгача «Сурхон»даги фаолиятида сиз учун қайси ўйин кўпроқ эсда қолган?
— Тўғрисини айтсам, мен учун барча ғалабалар жуда қадрли. «Сўғдиёна»га қарши ўйинни эслайман, ўтган йили жарима зарбасидан гол ургандим. Лекин такрорлаб айтаман, қанча гол урсам ҳам, мен учун жамоа ғалаба қозониши муҳимроқ.

— Мухлисларга тилакларингиз.
— Барча мухлисларимизга соғлиқ, бахт тилайман. Ишончингизни оқлашга ва ҳар бир учрашувда ғалаба қозонишга ҳаракат қиламиз.