"Surxon" klubi futbolchisi Kamron Saydazimov jamoasining Superliga doirasidagi "Metallurg"ga qarshi o‘yini oldidan o‘z fikrlarini bildirib o‘tdi.

— Kamron, avvalo «Metallurg»ga qarshi navbatdagi o‘yinga tayyorgarlik haqida gapirib bersangiz?
— Har bir o‘yindan oldingi kabi biz ham jismoniy, ham taktik tayyorgarlikka katta etibor beramiz. Jamoamiz ushbu bahsda g‘alaba qozonish va 3 ochkoni qo‘lga kiritish uchun har kuni mashg‘ulotlar olib boryapmiz. «Metallurg» – jiddiy raqib, jangavor jamoa. Bunday raqibga qarshi oson bo‘lmaydi, lekin bizning vazifamiz - faqat g‘alaba.

— Joriy yilda jamoada Sergey Arslonov boshchiligidagi murabbiylar shtabi faoliyat yuritmoqda. Hozirgi murabbiylar bilan ishlash siz uchun qanday?
— Birinchi navbatda, biz bilan ishlayotgan murabbiylarga hurmatimni bildirmoqchiman. Murabbiylar shtabining uslublari menga juda yoqdi. Biz juda yuqori malakali mutaxassislarni to‘pladik. Jamoamiz hujumkor futbol namoyish etadi. Murabbiylarimiz taktikada juda ilg‘or, ular futbolchilarga zaif tomonlarini to‘g‘ri ko‘rsatishni biladilar. Biz ularning ishi tufayli futbolga professional yondashuv bilan harakat qilamiz.

— Mavsum boshlanishini qanday baholaysiz?
— Turnir jadvalida 8-o‘rinda turibmiz. Bir tomondan, bu o‘tgan yilga nisbatan oldinga qadamdir. Boshqa tomondan, biz to‘xtashni xohlamaymiz. Biz faqat g‘alabalar uchun kurashmoqchimiz va bizda mavsum yakunida yuqori o‘rinni egallash istagi bor. Menimcha, xursand bo‘lishga hali erta. Oldinda muhim uchrashuvlar bor va biz kuchli jamoa ekanligimizni isbotlab, muxlislarimizni xursand qilishimiz kerak

— Shu kungacha «Surxon»dagi faoliyatida siz uchun qaysi o‘yin ko‘proq esda qolgan?
— To‘g‘risini aytsam, men uchun barcha g‘alabalar juda qadrli. «So‘g‘diyona»ga qarshi o‘yinni eslayman, o‘tgan yili jarima zarbasidan gol urgandim. Lekin takrorlab aytaman, qancha gol ursam ham, men uchun jamoa g‘alaba qozonishi muhimroq.

— Muxlislarga tilaklaringiz.
— Barcha muxlislarimizga sog‘liq, baxt tilayman. Ishonchingizni oqlashga va har bir uchrashuvda g‘alaba qozonishga harakat qilamiz.