Ла Лига "Барселона"нинг молиявий режасини тасдиқлайди.
Diario Sport хабарига кўра, Ла Лига кенгаши жума куни йиғилиш ўтказиб, Каталония клубининг янги молиявий режасини кўриб чиқди. Тақдим этилган йўл харитасида "Барса" икки йил давомида қандай қилиб 200 миллион евро тежашга эришиши ҳақида батафсил маълумот берди.
Лига вакиллари стратегияни ўрганиб чиқди ва уни маъқуллади, бу ҳақда клубга душанба куни расман хабар қилинади. Бу "кўк-анорранглилар"га трансфер бозорида иш бошлаш имконини беради.
Бироқ клуб вице-президенти Эдуард Ромеу Рональд Араухо, Маркос Алонсо, Серхи Роберто, Гави ва Иняки Пенья билан янги шартномалар имзолашни, шунингдек, Алекс Бальде билан шартномани 2027 йилгача узайтиришни биринчи ўринга қўймоқда.
Молиявий режанинг маъқулланиши "Барса"га 1/1 қоидаси бўйича ишга қайтиш имконини беради: тежалган ҳар бир евро учун клуб бир хил маблағни сарфлаши мумкин бўлади. Илгари каталонияликларга тежалган маблағнинг тўртдан бир қисмини сарфлашга рухсат берилганди.
