“Андижон” жамоаси бош мураббийи Александр Хомяков Суперлига 11-тури доирасида“Қизилқум” устидан қозонилган ғалабадан сўнг ўз фикрларини билдириб ўтди.

“Қийин учрашув ўтказдик. Баъзи режалар ўхшади, баъзилари эса ўхшамади. Бу ўйинда уч очко олишимиз шарт эди. Биз учун ҳозир энг муҳими натижа. Матонат ва фидойилик кўрсатган футболчилар олдида шляпамни эчаман. Ниҳоят, мухлисларимизни хурсанд қилишга эришдик. Ўз навбатида ишқибозларга ҳам алоҳида миннатдорчилик билдираман. Нима бўлишидан қатъий назар бизни қўллаб-қувватлашяпти ва уларга раҳмат.

Кубок доирасидаги “Навбаҳор”га қарши беллашувдан сўнг тикланиш учун бироз вақт камлик қилди. Рақибда эса учрашувга тайёргарлик кўриш учун икки кун кўпроқ вақт бўлди. Шундай бўлсада, йигитларимиз барчасини – ўйин ва натижа муҳимлигини ҳис қилиб туришди. Учрашув бошида анча қийин бўлди, асабий ҳолат юзага келди. Бундай баҳсларда ғалаба қозониш жуда ҳам муҳим”, – деди Хомяков.